Kerfie daag soms vroeër op…

So het Kersvader nou op die 23ste by ons opgedaag. Want Boeta moet môre terug tehuis toe. Gaan wel NOG ñ present kry, maar vanaand half sewe, hier in Harties, het die Rooi Baardman betyds sy teenwoordigheid getoon.

Ons beleef steeds chaos. Werklik. Vandag het die winkel oorgetrek, ons moet die Mall perseel ‘spiek en span’ los, en dit is bloedig warm. O ja, en ons trek huis ook tussenin…

Dit is nou 7 uur, manlief nog besig met uitverf in Rustenburg. Ek het saam met die trokke deurgery, en als is afgelaai. Ou huis toe gejaag, en vir Boet op die stoep aangetref. Hoekom? Hy soek vir Kerfie op die water. Hy weet van die briefie wat geskryf is, Kersvader, bring asseblief Boeta se presente vandag, want Noena en Bertus moet môre Richardsbaai toe ry. Neil verjaar op Kersdag, en hulle wil graag bietjie by hom wees. So asseblief Kerfie, maak half sewe Vrydag aand by Noena hulle ñ draai. Met my 11 geskenke.

So het Kerfie toe aangeklop, en walla… daar lê die 11 geskenke voor die deur. Arme Bertus mis hom sowaar! Darem was Ousus hier, dankie tog, sê Boeta.

Arme Bertus werk seker vanaand deurnag om klaar te kry. My maag pyn vir ñ vale na die operasie en nimmereindigende op en af laaiery.

Maar, Kerfie was hier!!!!

Geseënde Kersfees al my skriffel vriende…nuwe woord vir blokkers.☺☺☺

download-1st-january-2015-hd-wallpaper

Boeta se geskenk lysie: Pieter Koen se nuwe CD.

Joanita Claasen se nuwe CD. Romanz Cd.

Nuwe oorfone. Skryfboeke, penne, cokies, dik inkleurboek, inkleurkryte, skerpmaker , liniaal, uitveër. Stel trokke, stel brandweerwaens, ambulanse, en polisie. Nuwe almanak boekie vir 2017. En Rugby en krieket tydskrifte.

Jip, dis ons 54 jarige Boeta.

Moeks, ma kyk sekerlik van daar bo af. Wonder of julle Kersfees op aarde onthou?

 

Advertisements

Kom swaai ñ rukkie saam met my.

(fotos:Google Images)f1605e235b32a771e8ecc74f47f0e62d

Ek wonder wie ek sal nooi. Met wie in die ganse wêreld sal ek vir ñ paar ure so in die water op ñ swaai wil kuier.

Net een kans om te kies…

Iemand uit my verlede dalk, van wie ek antwoorde verlang. Of ñ goeie vriendin wat oorsee bly, om weer in te haal? Iemand soos Joyce Meyer om by te tap?

Dalk ñ gewese kêrel, net om te gesels? (ja Bert, ek weet jy lig nou jou wenkbroue).

Of sal dit die mees suksesvolle besigheids magnaat op aarde wees, wat kan raad gee.

Ag nee, hierdie moet ñ lekkerkry kuier wees, en ek wil kan lag. Hoog swaai en giggel.

So dit sal iemand moet wees met wie ek gemaklik is. Iemand wie ek vertrou, en my verstaan. My taal verstaan. My hart verstaan. Wat weet wat my laat lag. My laat huil.

Daar is sulke ‘gene’, defnitief. ñ Paar vriendinne. En die kinders. Natuurlik my man, maar saam met hom kuier ek meestal.

Ek hoop jy ken ook ‘diesulkes’. Hulle wat help bou aan jou lewe. Saam met wie jy heel voel, en kan sprankel. Wat paaie saam met jou geloop het en ñ stukkie van jou hart besit.

En ek hoop daar is iemand wat op hulle beurt my sal wil uitnooi.

Vir wie ek ook ñ stukkie sonskyn bring.

p1110019-002

Here, help my om in die nuwe jaar sag te loop in ander se lewens, mooi te werk met ander se drome. En in die proses te giggel van plesier.

 

 

 

Om die jaar se stof af te was.

unnamed

Om na ñ lang dag onder die stort in te klim en die stof af te was, dít is maklik. Om ñ jaar se vullis af te krop, moeiliker.

Iewers in die berge behoort daar ñ waterval met reinigende waters te wees. Die paadjie soontoe sal bebos te wees. Maar om dan daar aan te kom…

Bali-Uma-by-COMO-Ubud-15

Om die jaar se verkeerde besluite te kan herroep. Die verkeerde woorde terug te sluk. My selfvernietigende optredes af te stroop.

Om seerkry op te diep en te laat leegloop. Wonde se etter te laat skoonspoel.

Sommer so alleen, net ek en my siel onder helende water.

Die paadjie soontoe gaan die moeilike een wees. Elke tree beteken iets word afgelê. Dalk die eie ek wat so graag geregverdig wil voel. My innerlike gelowe wat op selfsug gebasseer is.

Die skanse sal platgeploeg moet word.

En sal ek naak staan.

Eers dan kan my vel die water voel. My hart die druppels hoor.

My gees vernuwe word.

271515-bigthumbnail

Eers dan kan ek die nuwe jaar in tuimel en dans. Met nuwe hoop en vertroue. En krag.

(geskryf vir my Here)

 

 

 

 

 

 

 

Eiland taal…

ñ Mens lees maar partykeer weer en weer voor jy regtig verstaan wat iemand probeer sê. En as jy die dag iets moet verduidelik, herhaal jy jouself so drie keer, en die vierde keer vra jy dat die persoon moet sê wat hy verstaan…Daarna begin julle weer van vooraf. Ons hoor verskillend, onthou.

Maak vrede daarmee voor jy in die vliegtuig klim.

anti_uber_sign_twitter(fotos:Google Images)

Is hier iewers ñ toilet asb.

(fotos:Google Images)Squatty

Dit was van die begin af ñ tammeletjie, dié ablusie geriewe in Suid-Oos Asië. Soos my skoonpa sou sê, dis ñ ander kerk se mense dié.

Van dag een af het ek en Bertus gegiggel oor hul vreemdheid. Op ñ oornag trein in Thailand het hy my benoud kom vra om hom asb. te kom help. Die piepklein badkamer was van hoek tot kant uitgeteel, heel netjies. Die toilet ‘opening’ was egter bo-op ñ halflyf hoogte stillasie. Te hoog vir my man om die ‘mik ding’ te doen. Toe klim hy bo-op. ñ Trein se plafon is egter baie laag. Om nou weer te mik, terwyl jy vooroor buig met jou kop vas teen die plafon, jou broek op jou voete, en die bewegende kajuit se geskommel, loop uit op ñ fiasko. Want jy moet aan die muur vasklou om te balanseer. En jou knieë in die proses ook knak.

Plat sit werk ook nie, hoor. Die opening is te diep na agter, so jou bene steek reguit voor jou uit.

Ken steeds nie die antwoord nie.

By ñ volgende oornag plek was daar instruksies in Engels agter die deur vasgegom. Mooi duidelik, met ñ tikkie humor by. Iemand het ons twee seker sien aankom.

1ikN6lT

In Yogjakarta weer, was daar net ñ vertrek met ñ water emmer en ñ beker. Gordyn voor. Geen opening êrens. Sulis moes toe maar kom demonstreer, want die nood was groot. Jy hurk enige plek, en na die tyd vat jy die water en spoel oor die plassie. Vloeistof syfer teen die kante af. Maar moenie verder vra nie. Ek weet nie. Wag vir jou hotel kamer.

toilets-sultan

 

roman-toilets-111025

070424_worldtoilet_vmed_.grid-4x2

_86768371_hi030149771-1

“It’s a man’s world” is al wat ek kan sê. Gelukkig is dit oral baie warm, so jy sweet. Die hotelle se badkamers is lieflik, maar as jy nou soos ek agter “bargains” aan ploeter, in nywerheidsgebiede, knyp jy maar oë toe.

Oppas egter. Maak seker jy is alleen…

snake_in_toilet.jpg.CROP.promovar-mediumlarge

Fluit fluit, my storie is uit.

 

 

Die groot trek.

(fotos:Google Images)wallup.net

Dit het gister amptelik begin. Die trek van ons winkel terug Harties toe.

Vir die afgelope paar maande probeer ek hierdie oefening in my kop deurwerk. ñ “Mercy” persoonlikheid hou glad nie van verrassings nie, ook nie van verandering nie. Ons het nodig om lank voor ñ skuif eers emosioneel ‘reg te skuif’. Deur die rouproses te werk, aan al die moontlike probleme en foute wat met hierdie groot besluit gepaard gaan, te knaag. En dan gelate oor te gee. Defnitief ietwat pateties.

Ek was steeds nie reg vir die sprong nie. Maar my man weet al, soms is dit nodig om my oor die bultjie te stamp. Gewoonlik gaan dit gepaard met skop en skree, en dan raak ek rustig. Nerwe af.

So hier sit ek nou, die laaste trokkie van die dag is so pas weg. Wyn. Wyn sou nou kon werk. Glasies vol.

Die uur snelweg lê egter en wag, so eerder nabetragting doen…

Dit is die regte besluit? Die deur wat so wawyd oop gegaan het is van die Here af? Besigheid moet weer optel? Dit sal werk…dit moet werk…Dalk moet ek dit eers stop. Dalk is ek te haastig. Dalk.

Mmm. Irriterend, ek weet. En dit is wat in my kop aangaan terwyl ek vriendelik vir die kliënte glimlag. Dit is wat arme Bertus vanaand saam mee in die bed moet klim.

ñ Vrou met stemme in haar kop. Een wat die bobbejaan agter die berg gaan soek en uitlok.

Vir hom kos gee, water ook.

Soos ek reeds gesê het. Pateties.

maxresdefault-2

Ouma se prinses.

img-20160918-wa012

Sy is net ñ tiekie hoog, hierdie middel kleinste van ons. Ek kyk haar gisteraand so, en ek luister na die bekkie. Ai Here, hierdie enetjie is so een op haar eie. Maar klaar wys in haar kleinsussie ‘plek’. Bewonder vir ouboet met  ñ reeds dieper insig as meeste.

My ouma hart breek effens as ek sien hoe sy haarself op ñ stil, sagte manier uitdruk, en vinnig weet wanneer om maar te laat los. So asof die lewe haar klaar begin leer het.

img-20150516-wa006

Ek sien stukkies van haar mamma in die dogtertjie voorkeure, sien baie van haar pappa in haar vasberadenheid.

U sal haar mos altyd bewaak, my Vader. Want ek weet vir U is sy meer kosbaar as selfs vir my. Seën haar ingaan en haar uitgaan, hierdie kleindogter van my.

Droom U drome oor haar.

img-20161205-wa0001

En dankie my God dat ek hulle ouma mag wees.